Ўзбекистон Президенти Шавкат Мирзиёев «Ўзбекистон Республикасида тиббий таълим тизимини янада ислоҳ қилиш чора-тадбирлари тўғрисида»ги қарорни имзолади. Бу ҳақда Президент матбуот хизмати хабар берди.
Тиббий таълим соҳасидаги ваколатли орган сифатида Соғлиқни сақлаш вазирлиги белгиланди, унга қуйидаги вазифалар қўшимча равишда юклатилди:
- олий ва ўрта махсус, касб-ҳунар тиббий таълими, малака ошириш учун давлат таълим стандартлари ва талабларини ишлаб чиқиш ва уларнинг бажарилишини таъминлаш;
- соғлиқни сақлаш мутахассисларини қайта тайёрлаш, шунингдек, олий малакали илмий-педагогик тиббий кадрларни тайёрлаш;
- таълим даврида тармоқли ва ихтисослашган фанлар, клиник ўқув амалиёти бўйича ўқув машғулотларини кенгайтириш ҳисобига, тиббий таълим муассасалари ўқувчи ва талабаларининг назарий ва амалий тайёргарлик даражасини яхшилашга қаратилган чора-тадбирлар комплексини амалга ошириш;
- тиббиётни ривожлантиришнинг замонавий йўналишлари бўйича илмий-тадқиқот ишларига профессор-ўқитувчиларни, бакалавриат ва магистратура талабаларини кенг жалб қилиш.
Гуманитар ва ижтимоий-иқтисодий блоклар бўйича ўқув соатларини жами ўқув вақтининг 7 фоизигача қисқартириш ҳисобига, клиникагача бўлган ва клиник блоклар бўйича ўқув соатларини жами ўқув вақтининг 85 фоизигача етказиш режалаштирилган.
Изоҳ (0)