Японияда икки қаватли купе ва жонли мусиқага эга поезд илк рейсни амалга оширди

Японияда дизайнер Кен Киёюки Окуяманинг лойиҳаси бўлмиш ўзига хос поезд илк рейсини амалга оширди. Дизайнер Ferrari Enzo, Maserati Quattroporte ва бошқа автомобиллар устида ишлаган, деб эслатади TJournal.

Япониянинг East Japan Railway темир йўл компанияси Shiki-Shima люкс поездини ишга туширди. У ўнта вагондан иборат бўлиб, шулардан олтитасида икки қаватли, ҳожатхона ва ювиниш хоналарига эга люкс-купелар жойлашган. Йўловчилар учун ажойиб таомлар ва жонли мусиқага эга ресторан, манзарали деразаларга эга иккита дам олиш зонаси ва бар кўзда тутилган.

Токио — Хоккайдо ороли йўналишидаги биринчи рейс 1 май куни амалга оширилди. Саёҳат давомида поезд бир неча марта тўхтайди.

Поезд учун чипаталар нархи — 4,4–10 минг доллар. Бу нарх ичига йўлкира ва овқат киритилган. Саёҳат давомийлиги рейсга қараб 2–4 кунни ташкил этади. Чипталар қимматлигига қарамай, чипталар бир йил олдинига буюртма қилиб бўлинди.