Келажак кириб келди: 7 та «ақлли» экоманзилгоҳ (фотогалерея)

Forbes нашри дунёнинг турли мамлакатларида жойлашган келажакка хос экологик тоза даҳаларнинг баъзилари билан таништирди.

Масдар, БАА

Абу-Даби халқаро аэропорти яқинда жойлашган. Шаҳар чўл билан ўралган бўлишига қарамай, бу ерда ҳарорат +20 даражадан ошмайди: буни 45 метрли шамол минораси табиий кондиционер сифатида таъминлаб туради. Масдарга 87 777 та замонавий қуёш панеллари электр энергиясини етказиб беради. Ҳозирча Масдарда асосан талабалар ва илмий ходимлар яшайди, аммо 2030 йилгача лойиҳага ажратилган 6 квадрат километр майдоннинг барчаси ишга туширилгач, шаҳарда 40 минг киши доимий яшаши, яна 50 минг киши ҳар куни ишга ёки ўқишга келиши мумкин.

BedZED, Буюк Британия

Лондон ташқарисидаги шаҳар 2002 йилдаёқ фойдаланишга топширилган. Бу ҳақиқий яшил даҳа. Бу ерда одам Лондондаги ўртача кўрсаткичга нисбатан 50 фоизга камроқ сув сарфлайди. Электр токининг бир қисмини 777 квадрат метр қуёш панеллари беради.

SolarCity, Австрия

Австриянинг Линц шаҳри марказидан ярим соатлик масофада жойлашган «Қуёш шаҳри»да 1400 та самарали энергия сарфига мослаштирилган хонадон бор, уйлар томларига эса қуёш панеллари ўрнатилган. Шаҳар оила билан яшаш учун ажойиб жой: кўлгача пиёда бориш мумкин, даҳа марказида эса банк, кутубхона, дўконлар, мактаб, боғча, спорт майдончаси ва қулай ҳаёт учун зарур бўлган бошқа жойлар бор.

Bo01, Швеция

Мальмёнинг Ғарбий бандаргоҳи ҳудудидаги ақлли даҳа. У анъанавий энергия манбаларига боғлиқ бўлмаган, экологик хом ашёдан ясалган уйлардан иборат, ресурслар истеъмоли ҳақидаги маълумотдан онлайн фойдаланиш мумкин бўлган, инфратузилмаси ривожланган шаҳарчадир. Аҳоли зич жойлашганига қарамай, бу ерда дарахтлар, кўллар ва яшил томлар кўп.

Фудзисава SSТ, Япония

Токиодан бир соатлик масофада жойлашган даҳа 19 гектар майдонни эгаллаган бўлиб, биз учун кичик ҳисобланган уч хонали уйлардан иборат. Бинолар томларига қуёш панеллари ўрнатилган, ҳар бир уй энергияни захира қилиб қўювчи батарея билан таъминланган. Уйлар ақлли техникага тўла.

Amanora Park Town, Ҳиндистон

Пуна шаҳри ташқарисида жойлашган боғ мажмуаси 182 гектар майдонни эгаллаган, унинг олтидан бир қисмини яшил ҳудуд ташкил этади. Бу ерда иккита мактаб, касалхона, ўт ўчириш станцияси, улкан савдо маркази ва инфратузилманинг бошқа зарур элементлари бор. Яқин ўн йил ичида у 20 минг кишига уй бўлиши кутилмоқда.

Сонгдо, Жанубий Корея

Сеулдан 65 км жанубда жойлашган ақлли даҳада ҳар қадамда компьютерлар бор, боз устига, улар ягона марказлашган тармоққа уланган. 6 квадрат километр майдонда 106 та бино жойлашган. Ҳудуднинг 40 фоизи кўкаламзорлаштирилган. Шаҳар кўчаларида ахлат қутилари ўрнига чиқиндиларни тўплашнинг вакуумли тизими ўрнатилган.