«Ал-Қоида» террорчилик ташкилотига алоқадор гуруҳ Санкт-Петербург шаҳри метрополитенида амалга оширилган теракт учун жавобгарликни ўз зиммасига олди. Бу ҳақда, SITE’га асосланиб, «Коммерсантъ» хабар бермоқда.
Петербург метросининг «Сенная плошчад» ва «Технологический институт» бекатлари оралиғидаги портлаш 3 апрель куни юз берган эди. Ҳодиса оқибатида 16 киши, жумладан, террорчи-худкуш Акбаржон Жалилов ҳам ҳалок бўлган, 50 га яқин киши тан жароҳати олган. Портлаш иши бўйича ҳозиргача 10 киши ҳибсга олинган.
Аввалроқ «Газета.ru» нашри Петербург теракт Абу Салоҳ ал-Ўзбекий тахаллусли дала қўмондони томонидан буюртма қилинган бўлиши мумкинлиги ҳақида хабар берган эди. У 2016 йили Хитойнинг Бишкекдаги элчихонасига уюштирилган ҳужум иши доирасида Интерпол томонидан қидирилмоқда.
Интерпол ал-Ўзбекийни террорчиликни молиялаштириш, ҳужжатларни сохталаштириш, давлат чегараларини ноқонуний равишда кесиб ўтиш ва жиноят ҳамжамиятни ташкил этишда ҳам гумон қилмоқда.
Маълумотларга кўра, Абу Салоҳ ал-Ўзбекийнинг Петербургдаги терактга алоқадорлигига доир ахборот Россия Тергов қўмитаси ва Федерал хавфсизлик хизмати томонидан текширилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)