Фотогалерея: Шанхай автосалонидаги электромобиллар

«Vc.ru» нашри Шанхай автосалонида намойиш этилган янги электромобиллар консептлари фотожамланмасини тақдим этди.

Volkswagen I.D. Crozz

I.D. Crozz электрокар концепти тўлиқ қувват билан 500 километргача ҳаракатланиш имконини берувчи иккита электродвигатель билан жиҳозланган. Аккумлятор 30 дақиқада 80 фоизга қувватланади. Машинанинг энг юқори тезлиги — 180 км/соат.

Автомобилнинг орқа эшиклари ҳаракатланади. Концептда олд ва орқа эшиклар ўртасида устун йўқ.

Автомобиль салонида физик тугма мавжуд эмас, фақат 10,2 дюймли экран ва проекцион дисплейли 5,8 дюймли ускуналар панели бор. Автопилот режимида руль ускуналар панели орқасига яширинади.

Skoda Vision E

Vision E кроссовери I.D. Crozz билан бир хил модуль платформасида лойиҳалаштирилган. Тўлиқ қувват билан юриш масофаси ва энг юқори тезлик ҳам I.D. Crozz билан бир хил, яъни 500 километр ва 180 км/соат.

Audi e-tron Sportback

Audi намунаси 4,5 сонияда 100 км/соат тезликка эришади. Тўлиқ қувват билан юриш масофаси 500 километрни ташкил қилади.

2020 йилгача компания учта электрокарни тақдим этишни режалаштирмоқда. Q6 e-tron йўлтанламаси 2018 йилда, Sportback 2019 йилда, шаҳар электр автомобили эса 2020 йилда дунё юзини кўради.

Nio ES8

Электромобиль Хитойнинг Nio компанияси томонидан яратилган. Муҳандислар автомобилнинг техник тафсилотларини ошкор қилмаган, бироқ ES8’нинг батареяларини қувватлаш шохобчасида тезкорлик билан алмаштириш мумкин.

Компания вакиллари автомобилни серияли ишлаб чиқариш 2018 йилда бошланишини маълум қилди.

Qoros K-EV

Концепт ҳар бир ғилдиракка тўғри келадиган тўртта электродвигатель билан жиҳозланган. Тўлиқ қувват билан 480 километр масофани босиб ўтади, энг юқори тезлик эса 260 км/соат. Автомобиль 2,6 сонияда 100 км/соат тезликка эришади.

K-EV’нинг чап тарафида фақат битта ҳайдовчи учун эшик бор. Ўнг томонда эса йўловчилар учун ҳаракатланувчи эшиик бор.

Chevrolet FNR-X

Chevrolet’нинг гибрид намунаси фаол аэродинамика тизими билан жиҳозланган. Ҳаракат вақтида компьютер слойлер қайрилишини, ён панелларни, олд панжара қаршилигини, ғилдирак дискларидаги чўткаларни тартибга солиб туради. Бу аэродинамикани яхшилаш ва автомобиль ҳаракати учун талаб қилинадиган энергия сарфининг камайиши учун қилинади.

Машина уни йўл четида бошқариши мумкин бўлган автопилот билан жиҳозланган.

«Дарё»нинг Telegram’даги расмий канали — @toshqindaryo’га аъзо бўлинг!