ОАВда МДҲнинг қатор мамлакатлари, хусусан, Украина, Қозоғистон, Россия ва Қирғизистонда ўсмирлар ўртасида ўз жонига қасд қилиш ҳолатлари кўпайиб бораётгани қайд этилиб, «Кўк кит», «Тинч уй», «Югур ва ҳалок бўл» каби «ўлим гуруҳлари» фаолияти батафсил таҳлил этилмоқда. «Жамият» газетасида эълон қилинган мақолада ҳам шу ҳақда сўз боради, дея хабар беради UZ24.
Мақолада, жумладан, шундай дейилади:
«Таассуфки, бундай ўйинлар кўпроқ биздан олисда содир бўляпти, деб бефарқ қараб бўлмайди. Чунки сўнгги пайтларда улар мамлакатимиз ўсмирларини ҳам четлаб ўтаётгани йўқ.
Хусусан, жорий йил март ойининг навбатдаги профилактика кунида пойтахтнинг Яккасарой туманидаги 135-умумтаълим мактабида ўтказилган ‘Давомат’ тадбирида ўқувчиларнинг нафақат дарсларга қатнашиши, балки уларнинг одоб-ахлоқ қоидаларига қанчалик риоя этаётгани ҳам эътибордан четда қолмади. Мактабнинг бир синфига кирганда туман ички ишлар бошқармаси ходимлари ўқувчиларнинг билакларини текшириб кўришга қарор қилди. Кутилмаган ҳолат рўй берди: икки ўқувчининг билакларида ўткир буюм билан кесиб чизилган балиқ расми борлиги аниқланди.
Ушбу ҳолат юзасидан ўтказилган суриштирув давомида ушбу ўқувчилар интернет тармоғида ‘Кўк кит’ номи билан тарқалган ўйиннинг видеоролигини кўриб, билакларига китнинг суратини чизганликлари маълум бўлди.
Ўқувчиларнинг ота-оналари бундан мутлақо бехабар экан. Аянчли ҳодиса қандай оқибатга олиб бориши нафақат ўқувчилар, балки ота-оналарга ҳам тушунтирилди.
ИИББ вакили ‘Тошкент’ телеканалининг ‘Пойтахт’ ахборот дастурига берган интервьюсида таъкидлашича, Тошкент шаҳрида ҳуқуқ-тартибот органлари вакиллари якуний мақсади ўз жонига суиқасд қилиш бўлган ‘Кўк кит’ ўйинида 15-даражага ўтган 5 нафар мактаб ўқувчисини ‘ўлим гуруҳи’дан сақлаб қолган».
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)