Тошкент шаҳрининг Юнусобод туманига Бахтиёр Абдусаматов ҳоким этиб тайинланди. Бу ҳақда шаҳар ҳокимлиги ахборот хизматига таяниб, UZ24 маълум қилди.
Бахтиёр Абдусаматов 1976 йилда Тошкент шаҳрининг Яшнобод туманида туғилган. 1996 йилда Жаҳон иқтисодиёти ва дипломатия университети, 2003- йилда Тошкент давлат иқтисодиёт университетини тамомлаган.
Меҳнат фаолиятини 1997 йили Ўзбекистон Республикаси Молия вазирлигида бошлаган.
2011-2013 йилларда Ташқи иқтисодий алоқалар, инвестициялар ва савдо вазири ўринбосари лавозимида фаолият юритган. Бундан олдин вазирлик тузилмаларида турли вазифаларда меҳнат қилган.
Бахтиёр Абдусаматов 2013 йилдан бери Ўзбекистон Республикаси табиатни муҳофаза қилиш давлат қўмитаси раиси бўлиб ишлаб келаётганди.
Эслатиб ўтамиз, олдинроқ Мираъзам Мирқосимов Юнусобод тумани ҳокими лавозимидан озод этилгани, унинг биринчи ўринбосари Сардор Қосимов ҳоким вазифасини вақтинча бажариб тургани билдирилганди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)