АҚШ президентининг рафиқаси Меланья Трамп ва кенжа ўғли Бэррон Нью-Йоркдан Вашингтонга жорий йил ёзда кўчиб ўтади. Бу ҳақда Оқ уйнинг юқори мартабали ходимига таяниб, Fox телекомпанияси маълум қилди, дея хабар беради «ТАСС».
Манбага кўра, кўчиб ўтиш хусусий мактабда таҳсил олаётган 11 ёшли Бэррон ўқув йилини якунлаганидан сўнг амалга оширилади. Меланья ва Бэррон айни пайтда Нью-Йоркдаги Trump Tower осмонўпари пентхаусида истиқомат қилмоқда.
Ўз навбатида, NBC телеканали Меланья ва Бэррон Вашингтондаги президент қароргоҳига июндан сўнг жойлашишини билдириб, масалага аниқлик киритди. Ҳозирда Меланья Оқ уйдаги хоналар учун мебел танлашда фаол иштирок этмоқда.
Маълумот учун, Бэррон Трамп Вашингтонга кўчиб ўтганидан сўнг 50 йилдан кўпроқ вақтдан бери Оқ уйда жойлашган биринчи АҚШ президенти ўғли бўлади. Охирги бор бу ерда 1963 йили президент Кеннедининг ўғли кичик Жон Кеннеди яшаганди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)