9 апрель куни бир неча соатлик фарқ билан Миср шимолидаги черковларда портлашлар содир этилди. Шу муносабат билан дунё мамлакатлари сиёсатчилари Миср аҳолисига таъзия сўзларини изҳор этди, деб маълум қилади «ТАСС».
«Бутун дунё христианлари учун жуда муқаддас бўлган кунлардан бирида Танта ва Искандариядаги коптлар черковларига ҳужум уюштирилди, кўплаб бегуноҳ одам ҳалок бўлди ва жароҳат олди», — деди Европа Иттифоқининг ташқи ишлар ва хавфсизлик сиёсати бўйича олий вакили Федерика Могерини.
У Европа Иттифоқи ҳалок бўлганлар қариндошлари ва яқинларига самимий таъзия изҳор этиши ва терроризмга қарши курашда Мисрга ёрдам беришга тайёрлигини қайд этди.
Президент Франсуа Олланд Франция Мисрдаги «жирканч терактлар»дан қайғуда эканлиги ва Миср ҳукуматининг терроризмга қарши курашини тўлиқ қувватлашини маълум қилди. Олланд ҳужумларда ҳалок бўлганлар қариндошлари ва яқинларига самимий таъзия изҳор этди.
Тунис Ташқи ишлар вазирлиги коммюникесида Тунис Мисрдаги икки террорчилик ҳаракатини қатъий қоралаши қайд этилди. Тунис ҳалок бўлганлар қариндошлари ва яқинларига самимий таъзия изҳор этиб, жароҳат олганларга тезроқ соғайиб кетишларини тилади. Шунингдек, Тунис Миср биродарлик халқига фуқаролар хавфсизлигини сақлаш борасида амалга оширилаётган барча чораларда кўмак беришини таъкидлади.
АҚШ президенти Дональд Трамп Twitter орқали Мисрдаги терактларни қатъий қоралаб, Миср президенти Абдулфаттоҳ ас-Сиси мазкур вазиятни керакли тарзда ҳал қилишига ишонч билдирди.
Германия канцлери Ангела Меркель Миср президенти Абдулфаттоҳ ас-Сисига ҳамдардлик билдирди. Таъзия сўзлари ГФР ҳукумати расмий вакили Штеффен Зайбертнинг Twitter’даги саҳифасида ҳам эълон қилинди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)