Суриядаги авиабазага ракетали зарба бериш учун АҚШ президенти Дональд Трампга Конгресс рухсати талаб қилинмаган. Бу ҳақда Оқ уй ҳуқуқий маслаҳатчиси томонидан тарқатилган баёнотда айтилади, деб ёзади «ТАСС».
«Конгресс рухсати талаб этилмайди, — дейилади ҳужжатда. — Америка ракетали ҳужумлари минтақада барқарорликни мустаҳкамлаш, кимёвий қуролдан фойдаланишга тўсқинлик қилиш ва фуқароларни ваҳшиёна жиноятлардан ҳимоя қилиш каби қатор омиллардан келиб чиқиб, ўринли куч қўлланилиши бўлган».
Баёнотда таъкидланишича, Трампнинг хатти-ҳаракатлари аввалги президент Барак Обама 2011 йил Ливияда олиб борган ҳарбий операция билан баравар. Ҳуқуқий маслаҳатчи Оқ уй хўжайини «АҚШ миллий манфаатларини ҳимоя қилиш ҳуқуқига эга» эканлигини қайд этади. Ушбу ҳолатда эса, унинг талқинига кўра, мамлакат миллий манфаатлари — бу «кимёвий қурол қўлланилиши таҳдид солаётган минтақавий барқарорликни таъминлаш».
Изоҳ (0)