Нилуфар Усмонова: Юлдуз Усмонованинг ягонагина қизалоғи бўлганим билан тарихда қолсам керак

Бугун хонанда Нилуфар Усмонова ўз таваллуд айёмини нишонламоқда. Хонанда бугун 30 ёшни қарши олди, деб ёзади «Darakchi.uz».

6 апрель санаси кириб келиши билан хонанда ўзининг ижтимоий тармоқдаги саҳифасида онасига миннатдорчилик сўзлари битилган пост ёзиб қолдирди.

«Бу дунёга кимлар келар, кимлар кетар, аммо ҳамма-ҳаммага ҳам тарихда қолиш насиб қилавермайди, лекин Оллоҳга минг шукрлар бўлсинки, яқингина ўтмишда тақдир мени туғилишим биланоқ тарихга муҳрлади. Бу ҳам бўлса онам туфайли! Тарихда санъатим зўр ёки истеъдодим бўлгани учун эмас, айнан Юлдуз Усмонованинг ягонагина қизалоғи бўлганим учун қолсам керак, деб ўйлайман.

Азиз онажоним, мени дунёга келтирганингиз учун, менга оқ сут берганингиз учун, ўз пайтида қаттиққўлик қилиб, меҳрингизни ҳам аямаганингиз учун Сизга адоқсиз раҳмат! То тирик эканман мен сизнинг ўша жажжигина Нилуфарингиз бўлиб қоламан. Тақдиримда борингизга, яшашни ўргатганингизга ташаккур. Доим сизни севиб, меҳрингиздан қувват олгувчи қизингиз Нилу...»

Хонандани биринчи бўлиб табриклаган унинг турмуш ўртоғи бўлди. «Севимли инсонинг биринчи бўлиб табриклаганда ажойиб ҳисларни туясан...», — деб ёзади Нилуфар Усмонова.

Нилуфар Усмонова бундан роппа-роса бир ой олдин тўртинчи бор она бўлган эди. У тўртинчи фарзанди, қизи Саъдияни дунёга келтирди, эртага қизи 1 ойлик бўлади.

«Дарё»нинг Telegram’даги расмий канали — @toshqindaryo’га аъзо бўлинг!