Samsung Galaxy S8 ва S8+ смартфонларини стол компьютерига улаш имконини берувчи DeX док-станциясини намойиш этди, деб ёзади TJournal. У тасвирни ташқи мониторга чиқариш ҳамда клавиатура ва сичқонча каби аксессуарлардан фойдаланиш имкониятини беради. Бу ҳақда компания вакиллари Нью-Йоркдаги тақдимотда гапириб берди.
Док-станция USB-кабел орқали уланадиган янги Galaxy S8 ва S8+ смартфонларини қўллаб-қувватлайди. Қурилма яна битта USB, HDMI-йўлаги, Ethernet-порт, USB Type-C разёми ва совитиш учун вентилятор билан жиҳозланган. Шунингдек, смартфонни Adaptive Fast Charging симсиз технологияси ёрдамида қувватлантириш мумкин.
DeX монитор ва аксессуарларга улангач, Galaxy S8’даги Android мобил операцион тизими стол компьютериники каби тус олади: экран ориентацияси ўзгаради ва янги бошқарув элементлари пайдо бўлади. Android’нинг ўзгарган интерфейси тўла-тўкис браузер орқали бир вақтнинг ўзида бир нечта ойналарни бошқариш имконини беради.
Samsung VMware, Adobe ва Microsoft билан ҳамкорлик қилади, шу туфайли док-станция ёрдамида Windows дастурларини масофадан бошқариш, шунингдек, виртуал иш столи, MS Office пакети ҳамда Adobe Acrobat Reader ва Lightroom Mobile дастурларидан фойдаланиш мумкин.
DeX Galaxy S8 билан бир вақтда — 2017 йил 21 апрелда сотувга чиқади.
Изоҳ (0)