Наврўз байрами муносабати билан хорижда Ўзбекистон халқига самимий табриклар ва тилаклар билдирилмоқда. Улардан айримларини «Жаҳон» ахборот агентлиги келтирди.
Аввало барча ўзбекистонликларни ажойиб ва гўзал Наврўз айёми билан табриклайман!Буюк Ипак йўли ва европаликларга тароватли ўлкангизни очиб берган италиялик машҳур сайёҳ Марко Поло сабабли икки мамлакат халқлари ўртасида қадимдан савдо алоқалари амалга ошириб келинган. Бугунги кунда кўплаб италияликлар Самарқанд, Бухоро ва Хива каби тарихий шаҳарларни яхши билади ва ёқтиради.
Фурсатдан фойдаланиб, Италия ва Ўзбекистон ўртасида дипломатик муносабатлар ўрнатилганининг 25 йиллиги билан ҳам табриклашга ижозат беринг. Италия парламенти аъзолари республикангизга эҳтиром билан ёндошади, шу боис икки давлат ўртасида турли соҳалардаги ҳамкорлик янада юқори даражага кўтарилишига умид қиламиз.
Ренцо Карелла, Италия депутатлар палатаси ва Италия—Ўзбекистон парламент гуруҳи аъзоси
Ўзбек халқини баҳорги янги йил — Наврўз билан қутлайман ва уни шод-хуррамлик билан ўтказишингизни тилайман.Ўзбекистонга келганим, Тошкент ва Самарқандда бўлганимни доим мамнунлик билан эслайман. Ўшанда Ўзбекистоннинг Биринчи Президенти Ислом Каримов билан танишиш насиб этганди. Бу ҳаётимдаги энг бетакрор лаҳзалардан бири бўлиб қолди. Ислом Каримов қуёшли Ўзбекистондан эсдалик сифатида менга миллий зарбоф тўн совға қилганди.
Яқинда яна бир муҳим ҳодиса — Ўзбекистон ва Италия ўртасида дипломатик муносабатлар ўрнатилганининг 25 йиллигини нишонлаймиз. Халқларимиз ўртасидаги дўстлик, ҳамкорлик бундан буён янада мустаҳкамланишига ишончим комил.
Ал Бано, хонанда
Изоҳ (0)