Ер юзидаги энг соғлом одамлар қандай овқатланиши аниқланди
Америкалик олимлар гуруҳи, мутахассислар фикрича, энг соғлом юракка эга кишилар — Боливиянинг Tsimane қабиласи вакиллари нима билан озиқланишини аниқлади, деб ёзади Gizmodo.
Тадқиқотда 705 нафар боливиялик қатнашди. Олимлар юрак томирларининг кальций индекси (CAC)ни аниқлади, ушбу кўрсаткич орқали юрак ишемия касалликлари рискини баҳолаш мумкин. 100—400 га тенг индекс юрак томирлари функцияларининг осон бузилиши эҳтимоли юқори эканлигини кўрсатади.
Тадқиқот иштирокчиларининг 85 фоизида ушбу кўрсаткич бирдан юзгача бўлган чегарада эканлиги аниқланди. Шу билан бирга, 75 ёшга тўлганларнинг 65 фоизида CAC нолга тенг бўлиб чиқди. Олимлар фикрича, юрак-томир касалликларига чалинишнинг бундай паст риски қабила одамлари олиб борадиган соғлом ҳаёт тарзи билан боғлиқ. Улар чекмайди ва алкоголь қабул қилмайди, бир кунда эса 15—17 мингтадан қадам босади.
Бундан ташқари, CAC даражаси паст бўлишига боливияликларнинг рациони ҳам таъсир ўтказади. Унинг катта қисмини гуруч, маккажўхори, маниок илдизи ва плантан сабзавот бананлари ташкил қилади. Шунингдек, улар кўп ёнғоқ ейди. Умуман олганда, калориянинг 72 фоизи организмга углеводлар билан бирга киради, 14 фоизи эса — ёғлар билан. Қолган улуш оқсиллар ҳиссасига тўғри келади, аммо қабиладагилар Ғарб мамлакатлари аҳолисидан кўпроқ ёғсиз гўшт ейди.
