Марокашда ИШИД билан алоқадорликда гумон қилинган 15 киши қўлга олинди

Марокаш расмийлари ИШИД террорчилик ташкилоти билан алоқадорликда гумон қилиб, 15 кишини қўлга олди. Бу ҳақда «Коммерсант.ru» хабар бермоқда.

«Ҳибсга олинган шахслар портловчи қурилмаларни тайёрлаш ҳақида тушунчаларга эга бўлган. Улар мамлакат ҳудудида терактларни амалга ошириш учун мазкур қурилмаларни тайёрлашда керак бўладиган материалларни олишни режалаштирган», — дейилади Марокаш ички ишлар вазирлиги баёнотида.

Жиноятчилардан бири Касабланкада фаолият олиб борган. У ИШИД жангарилари номидан ҳужум уюштиришга чақирилган видеомурожаат тайёрлаган. Қолганлари таниқли шахсларни ўлдириш учун ўқотар қурол харид қилишни мўлжаллаган эди. 

Марокаш хавфсизлик хизматига кўра, 2 мингга яқин марокашлик ИШИД сафида Сурия ва Ироқда жанг қилмоқда. Улардан 200 нафари ватанига қайтгач, ҳибсга олинган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

«Дарё»нинг Telegram’даги расмий канали — @toshqindaryo’га аъзо бўлинг!