Яман аҳолисининг деярли учдан икки қисми очлик билан тўқнаш келиб, тез ёрдамга муҳтожлик сезмоқда. Кучли даражадаги озиқ-овқат етишмаслиги 17 миллиондан зиёд кишининг ҳаётига хавф солмоқда. Бу ҳақда БМТ Озиқ-овқат ва қишлоқ хўжалиги ташкилоти, ЮНИСЕФ ва Бутунжаҳон озиқ-овқат дастурининг қўшма баёнотида маълум қилинди, деб хабар беради «РИА Новости».
«Аҳолисининг, тахминан, 17 миллион нафари озиқ-овқат хавфсизлигининг ‘фавқулодда’ ёки ‘инқироз’ даражасида турганини ҳисобга олган ҳолда айтиш мумкинки, Яман айни дамда бутун дунёда йирик очлик ўчоқларидан бири саналади. Яъни 2016 йил июнидан бери оч қолаётганлар сони 21 фоизга ошган», — дейилади баёнотда.
Маълум қилинишича, мамлакат аҳолисининг деярли тўртдан бир қисми яшайдиган икки вилоят — Таиз ва Ал-Ҳудайда қўшимча гуманитар ёрдамсиз очлик қопқонига тушиш хавфи остида қолмоқда.
Мазкур вилоятлар аввалдан Яманда асосий озиқ-овқат ишлаб чиқарувчилар бўлиб келган. Можаронинг кучайиши билан икки йилдан бери интенсив давом этаётган фуқаролик тўқнашувлари ушбу вилоятларда ҳам мушкул вазиятни юзага келтирган.
Можаро озиқ-овқат хавфсизлиги ва яшаш учун зарур эҳтиёжларга салбий таъсир кўрсатмоқда. Яманнинг қарийб 80 фоиз уй хўжалиги иқтисодий ҳолати инқирозгача бўлган даражага нисбатан ёмонлашганини маълум қилган.
«22 вилоятдан 20 таси озиқ-овқат хавфсизлигининг ‘фавқулодда’ ёки ‘инқироз’ даражасида турибди, аҳолининг қарийб учдан икки қисми очлик билан тўқнашиб, ҳаётини сақлаб қолиш учун тез ёрдамга ҳамда яшаши учун зарур эҳтиёжларга муҳтожлик сезмоқда», — дейилади баёнотда.
Изоҳ (0)