Фантастика! «Барселона» 4 та гол фарқини йўққа чиқариб, Чемпионлар лигасининг чорак финалига йўл олди

Париждаги 0:4 ҳисобидаги мағлубиятига қарамай, Каталониянинг «Барселона» клуби Чемпионлар лигасининг чорак финалига йўл олди.

«Камп Ноу» стадионида кечган жавоб беллашуви 6:1 ҳисоби билан ўз якунига етди. Биринчи бўлимни 2 та гол фарқи билан якунлай олган Испаниянинг амалдаги чемпиони 62-дақиқада ўз дарвозасидан гол ўтказиб юборди ва вазиятни янада қийинлаштирди.

Учрашув асосий вақти якунига 3 дақиқа қолганида эса ҳақиқий томоша бошланди ва «Барселона» яна 3 та гол уришга муваффақ бўлди. Бунда Неймар дубл қайд этган бўлса, захирадан майдонга тушган Серхи Роберто сўнгги сонияларда жамоасини навбатдаги босқичга олиб чиққан голга муаллифлик қилди.

Маълумот учун, Чемпионлар лигаси тарихида 0:4 ҳисобидаги мағлубиятдан кейин камбэк қилган жамоа йўқ эди. «Барселона» бу борада биринчи бўлди ва тарихий натижага қўл урди.

Европа Чемпионлар лигаси 1/8 финал 8 март, чоршанба

«Барселона» — «ПСЖ» 6:1