Россия президентининг матбуот котиби Дмитрий Песков Россия томонидан Донецк ва Луганск халқ республикаларининг (ДХР ва ЛХР) тан олиниши эҳтимолини изоҳлади, деб ёзади «Коммерсантъ». Журналистларнинг саволларига жавоб бераётиб, Песков Россиянинг ташқи сиёсатини давлат раҳбари белгилаб беришини таъкидлади.
«Битта нарсани айтишим мумкин: конституция бўйича Россия давлатининг ташқи сиёсати давлат раҳбари, яъни Россия Федерацияси Президенти томонидан белгиланади», — деди матбуот котиби.
Нашр эслатишича, аввалроқ ОАВлар Давлат думасининг МДҲ масалалари бўйича қўмитаси раҳбари Леонид Калашниковга таянган ҳолда, агар Украина ушбу ҳудудда жанговар ҳаракатларни бошласа, ДХР ва ЛХРнинг Россия томонидан тан олиниши юз бериши мумкинлигини маълум қилган эди.
Февраль ойида Владимир Путин ДХР ва ЛХРнинг «аслида амал қилувчи» ҳукумат органлари томонидан берилган ҳужжатларни Россияда тан олиш ҳақида фармон имзолаганди. Амал қилиш муддати — Донбассдаги «вазият сиёсий жиҳатдан тартибга солингунича». Украина президенти Пётр Порошенко буни «халқаро ҳуқуқ бузилишининг яна бир далили» деб атади.
Изоҳ (0)