Ўзбекистон Президенти 28 февраль куни Мўйноқни ривожлантириш тўғрисидаги қарорни имзолади. Бу ҳақда Меҳнат вазирлигининг Facebook’даги саҳифасида хабар берилди.
Ҳужжат 2017—2018 йилларда Қорақалпоғистоннинг Мўйноқ туманини ривожлантириш дастурини комплекс тарзда амалга оширишни кўзда тутади. Инвестициявий лойиҳаларнинг манзилли рўйхатига саноат соҳасидаги жами қиймати 30 миллиард сўмлик 28 та лойиҳа, хизмат кўрсатиш ва сервис соҳасидаги жами қиймати 17,2 миллиард сўмлик 28 та лойиҳа, шунингдек, қишлоқ хўжалик маҳсулотларини қайта ишлаш ва қишлоқ хўжалигини ривожлантииш бўйича 16 та лойиҳа киритилган.
Шунингдек, Президент қарори собиқ Мўйноқ балиқ-консерва комбинати ва 5-қурилиш бошқармасининг 20,5 гектар ҳудудида «Мўйноқ» кичик саноат зонаси ташкил қилишни кўзда тутади.
Мўйноқ туманига инвестиция киритишга қарор қилган тадбиркорлар учун алоҳида, республикада ўхшаши бўлмаган, имтиёз ва преференциялар тақдим этилади. Чунончи, қарийб ўн йилга, 2017 йил 1 апрелидан 2027 йил 1 январигача:
- «Мўйноқ» кичик саноат зонасида қайта яратилган ва тадбиркорлик фаолиятини олиб бораётган саноат соҳасидаги корхоналар солиқларнинг барча туридан;
- Мўйноқ тумани ҳудудида рўйхатдан ўтган ва ўз фаолиятини олиб бораётган якка тадбиркорлар қатъий белгиланган солиқдан;
- Туман ҳудудида рўйхатдан ўтган ва ўз фаолиятини олиб бораётган юридик шахсларнинг таъсисчиларига тўланадиган дивиденд кўринишидаги даромадларга солинадиган солиқлардан озод этилади.
Дастурда алоҳида урғу сайёҳлик салоҳиятини яратишга берилган. Шунингдек, ҳужжат Мўйноқ шаҳрини ободонлаштириш бўйича катта кўламдаги ишларни олиб боришни кўзда тутади.
Изоҳ (0)