Россиядаги халқаро фестиваль танловида ўзбекистонлик сартарош ғолиб бўлди

Россиянинг Санкт-Петербург шаҳрида «Нева қирғоқлари» гўзаллик фестивали бўлиб ўтди, деб ёзади «Миамир.рф» нашри. Сартарошлик санъати, маникюр ва декоратив косметика бўйича чемпионатларни ўз ичига олувчи танловда ўзбекистонлик Фариддун Бурхонов ғолиб бўлди.

Самарқанд шаҳрида жойлашган Zumi Yu гўзаллик студияси вакили Фариддун ўн битта сартарошлик танловидан саккизтасида қатнашиб, максимал балларни тўплади.

«Мен ‘Нева қирғоқлари’ танловида гран-при ютиб олишга учинчи марта уринмоқдаман, бунга икки марта эриша олмадим, мана, ниҳоят, стилистлар профессионал дунёсининг бош кубоги менинг қўлларимда!» — деди Фариддун.

Бу йил чемпионатда 1500 дан ортиқ киши қатнашди, улар сартарошлик санъати, нейл-дизайн, визаж, косметология, доимий макияж, боди-арт бўйича 50 дан зиёд танловларда куч синашди. Танлов иштирокчилари Россиянинг турли ҳудудлари, Украина, Беларусь, Ўзбекистон, Қозоғистон, Молдова, Болтиқ мамлакатлари, Венгрия, Германия, Италия, Финляндия, Исроил каби мамлакатлардан ташриф буюрди.

Мамлакатлар ўртасида жамоалар бўйича биринчи ўринни Беларусь, иккинчи ўринни Латвия ва Украина, учинчи ўринни эса Ўзбекистон ва Эстония эгаллади.