Ўзбекистон Республикаси Президенти Шавкат Мирзиёев Қашқадарё вилоятига ташрифи давомида тўқимачилик маҳсулотлари ишлаб чиқаришга ихтисослашган «ЛТ Текстиль Интернейшнл» Ўзбекистон — Хитой—Нидерландия қўшма корхонаси лойиҳаси билан ҳам танишди. Қўшма корхона директори Чен Жи ташрифдан сўнг ЎзА мухбирига келгусидаги режалар ҳақида қуйидагиларни маълум қилди.
— Компаниямиз раҳбарлари Ўзбекистонда бир неча марта бўлиб, бу ердаги шароитлар билан яқиндан танишди. Ўзбекистондаги чет эллик инвесторларга яратилган қулай муҳит бизга ҳар томонлама маъқул бўлди. Тўқимачилик маҳсулотлари ишлаб чиқаришга ихтисослашган «ЛТ Текстиль Интернейшнл» қўшма корхонасида Қашқадарё вилоятида етиштирилган пахта толасини қайта ишлаб, бозорга тайёр маҳсулот чиқариш мўлжалланган.
Биринчи босқичда пахта толасидан ип-газлама ишлаб чиқарилади. Бу жараён жорий йилнинг иккинчи чорагидан бошланади. Иккинчи босқич 2018 йилнинг тўртинчи чорагида фойдаланишга топширилиши режалаштирилган. Ўзбекистон Республикаси Президенти Шавкат Мирзиёев лойиҳа билан танишиб, уни тезроқ ишга тушириш чораларини кўришни таклиф қилди. Бу таклиф бизга ҳам маъқул бўлди.
Мазкур лойиҳани тайёрлаш жараёнида Ўзбекистоннинг барча вилоятлари иқлим шароитини ўргандик. Қашқадарё вилоятини танлаганимиз бежиз эмас. Бу ҳудудда етиштирилган пахта толасининг пишиқлиги, соҳага ихтисослашган касб-ҳунар коллежларининг мавжудлиги эътиборга олинди.
Жорий йилда 60 нафар коллеж битирувчисини Хитойга малака оширишга юборишни режалаштирганмиз. Бу уларнинг соҳани чуқур ўрганишида ва самарали фаолият бошлашида муҳим омил бўлади. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)