Ўзбекистонда ҳуқуқий ахборотни тарқатиш тўғрисида қонун қабул қилинади

«Ҳуқуқий ахборотни тарқатиш ва ундан фойдаланиш имкониятини яратиш тўғрисида»ги қонун лойиҳаси Нормaтив-ҳуқуқий ҳужжатлар муҳокамаси порталига жойланди, деб ёзади «Газета.uz».

Ҳуқуқий ахборотдан фойдаланиш давлат томонидан кафолатланади. Ҳуқуқий ахборотни тарқатиш усуллари орасида норматив-ҳуқуқий ҳужжатлар матнларини расман жўнатиш, уларнинг расмий ёки норасмий тарзда чоп этилиши, ҳуқуқий тарғибот, шунингдек, сўровлар бўйича ҳуқуқий ахборотдан фойдаланиш имкониятини тақдим этиш бор.

Интернетда қонунчилик маълумотларининг тизимлаштирилган ягона давлат электрон базаси бўлиб, Адлия вазирлиги томонидан юритиладиган Қонун ҳужжатлари маълумотлари миллий базаси (Lex.uz) ҳисобланади. Ушбу ресурсдан фойдаланиш бепул.

Нормaтив-ҳуқуқий ҳужжатлар матнларининг электрон версиялари уларни қабул қилган органларнинг расмий веб-сайтларида, улар расман чоп этилганидан кейин кўпи билан икки кун ўтгач албатта эълон қилиниши керак.

Агар маълумот давлат сири ёки қонун томонидан ҳимоя қилинадиган бошқа сирдан иборат бўлса, бундай ҳуқуқий ахборотдан фойдаланиш имконияти чекланади.