Баъзи автомобиль брендларининг яратилиш тарихи

Peugeot, Mercedes-Benz, Skoda… Дунёга машҳур автомобиллар номлари қандай келиб чиққан?

Skoda ҳақида гапирсак, бу жуда оддий — марка унинг асосчиси, Эмиль Шкода шарафига номланган. Эмблемаси эса 1926 йилда пайдо бўлган. Унинг муаллифи дея Pilsen ŠKODA фирмасининг тижорат директорини тилга олишади. У Америкада бўлиб, ҳиндуларнинг мистик сирларига шунчалик қизиқиб қолганки, уларни янги автомобиль фирмасининг лавҳасига жойлаштиришни таклиф қилган.

Mercedes-Benz тарихи анча чалкаш. Дастлаб Г. Даймлер ва К. Бенц XIX асрнинг 80-йилларида биринчи автомобилларни ишлаб чиқариш бўйича иккита рақобатчи фирмани яратди. Бизнесмен Эмиль Еллинек 1901 йилда Даймлерга спорт автомобилини буюртма қилди ва уни ўз қизи шарафига Mercedes деб атади. 35 от кучига тенг автомобиль муаффақиятли чиқди ва уни сериали ишлаб чиқаришга қарор қилишди, Mercedes номи эса бутун фирма билан боғлиқ бўлиб қолди. Жаҳон молия инқирози даврида 1926 йилда Daimler ва Benz фирмалари ҳозирги Mercedes-Benz номи остида бирлашди.

Франциянинг Peugeot компанияси аслида тегирмонлар орқали танилганини кўпчилик билмаса керак. 1810 йилда тегирмончи ака-ука Пежолар сув тегирмонларидан бирини саноат мануфактурасига айлантирди. 1825 йилдаёқ Peugeot фирмаси бир нечта корхоналарга эгалик қилган. 1882 йилда фирмада диаметри 1,86 метрга тенг улкан олд ғилдиракли биринчи велосипедларни ишлаб чиқариш йўлга қўйилди. Peugeot’нинг биринчи автомобили эса Serpollet буғ машинаси бўлди, у Франция инқилобининг 100 йиллиги арафасида Париж кўргазмасида тақдим этилди.

Яна бир сирли фамилия бошқа бир бренд, аниқроғи Американинг Cadillac бренди номида қатнашган. 115 йил аввал муҳандис Генри Лиланд сифатли брендни яратиш устида энди ўйлаётган вақтда, бу ғоя унинг кўплаб ҳамкасблари томонидан аллақачон синаб кўрилган эди. Орзуни рўёбга чиқариш устида мутахассисларнинг бутун бир жамоаси, шу жумладан, Генри Форд ишлаган, шу туфайли битта фамилияни ажратиб кўрсатиш иложи бўлмаган. Таъсисчилар кенгаши брендни ХVII асрнинг донғи чиққан қаҳрамони, ҳиндулар билан жанг қилиб, Детроит шаҳрига асос солган аристократ Антуан де ля Кадияк шарафига номлашга қарор қилди. Де ля Кадияк авлодининг герби эса марка логотипига айланди.