Европа Чемпионлар лигасининг чорак финалига йўлланма олиш учун Каталониянинг «Барселона» клуби «ПСЖ» довонидан ўтиши керак эди. Томонларнинг Париж шаҳрида бўлиб ўтган илк ўйинида испанияликлар 0:4 ҳисобида имкониятни бой берди.
Франция пойтахтида кечган беллашувда Анҳель Ди Мария дубл қайд этган бўлса, Юлиан Дракслер ва Эдинсон Кавани ўз ҳисобига 1 тадан гол ёзиб қўйди. Натижада «Барселона» 8 март куни бўлиб ўтадиган жавоб ўйини олдидан ўз аҳволини оғирлаштириб қўйди.
Луис Энрике бошқарувидаги жамоа гуруҳни 15 очко билан якунлаб, фақатгина «Манчестер Сити» майдонида 1:3 ҳисобида енгилганди. Чемпионлар лигасининг жорий мавсумида Париждаги мағлубият иккинчиси бўлди. Барча мусобақаларни қўшиб ҳисоблаганда эса шу мавсумдаги илк йирик мағлубият бўлиб тарихда қолди.
Қайд этиш керак, Унаи Эмери мураббийлик қилаётган «ПСЖ» гуруҳ босқичида 12 очко жамғариб, «Арсенал»дан кейин иккинчи бўлганди. Парижликлар Лондон клубини ҳар икки ўйинда ҳам мағлуб эта олмаган, шунингдек, ўз майдонида Болгариянинг «Лудогорец» клуби билан ҳам муросага рози бўлиб, гуруҳни мағлубиятсиз якунлаганди.
Нимчорак финалнинг иккинчи ўйини Португалия пойтахти Лиссабонда ўтиб, маҳаллий «Бенфика» Дортмунднинг «Боруссия» клубидан устун келди — 1:0. Мазкур беллашувда Бундеслига тўпурарларидан бири бўлган Пьер-Эмерик Обамеянг пенальтидан аниқ фойдалана олмади.
Европа Чемпионлар лигаси 1/8 финал 14 февраль, сешанба
Изоҳ (0)