«Ижтимоий фикр» жамоатчилик фикрини ўрганиш маркази «Ўсмирлар ўзи ва оиласи ҳақида» мавзусида тадқиқот ўтказди, дея хабар бермоқда ЎзА.
Тадқиқот Ўзбекистонда бола тарбияси, ўсмирларнинг фойдали меҳнатга жалб этилиши, уларнинг ватанпарварлик туйғусини оширишда оиланинг ролини аниқлаш мақсадида ўтказилган.
Унда Ўзбекистоннинг барча ҳудудларидан 12—16 ёшли ўғил-қизлар иштирок этган. Иштирокчиларнинг аксарияти ота-она иштирокидаги оила фарзандлари экани алоҳида қайд этилган.
Иштирокчилар оиласидаги муҳит, тартиб-қоидалар, ота-оналарининг ўзаро муносабатларини ўзларига намуна, деб ҳисоблайди. «Мактабингизни яхши кўрасизми?» деган саволга уларнинг 90,9 фоизи ижобий жавоб берган.
«Сўров натижалари ёшларнинг ўз мактабини қадрлаши ва яхши кўриши, мактабдаги билим, ҳаётий кўникма ва малакалар уларнинг келажагига пойдевор бўлишини кўрсатди. Мактаб вақтни мазмунли ўтказиш маскани экани ҳам эътироф этилган», — дейилади ЎзА ахборотида.
Маълум бўлишича, ўзбекистонлик ўсмирлар ўқишни ҳаётий зарурат, деб ҳисоблайди. Айни вақтда, уларнинг 43,7 фоизи ўқув адабиётини ўқиш билан чекланади.
«Ҳар ўн иштирокчидан бирининг тан олишича, ўқув адабиётидан бошқа китоб ўқимайди. Қатнашчиларнинг ярми (ўғил болалар) кўпинча тенгдошлари билан суҳбат қуриш, компьютер ўйнашни афзал билади», — деб ёзади ЎзА.
Тадқиқот жараёнида ўсмирларнинг мақсад ва интилишлари ҳам ўрганилган. Ўрта ва юқори синф ўқувчиларининг деярли ҳаммаси (97,7 фоиз) ҳаётдаги мақсади ва келажакдаги режаларини белгилаб олган.
Ҳар икки ўқувчидан бирининг ҳаётдаги идеали, қаҳрамони уларнинг ота-онаси экани аниқланди.
«Ўзбекистон ўсмирлари ўқитувчилари, таниқли сиёсатчилар, жамоат арбоблари, фан ва маданият намояндаларига ўхшашни истайди. Иштирокчиларнинг ўндан бири спортчи ва тиббиёт ходимларига меҳр қўйган», — дейилади ЎзА хабарида.
Ёшларнинг аксар қисми (қанчалиги кўрсатилмаган) ўзларини ватанпарвар, деб билади. Ўсмирларнинг 93,7 фоизи оила энг севимли ва яқин инсонларнинг иттифоқидир, дея хулоса берган.
«Тадқиқот натижалари Ўзбекистонда замонавий фикрловчи, ҳаётга муҳаббати кучли, аниқ мақсадли ва энг асосийси, ўзига ишонган янги авлод шаклланаётганини кўрсатди», — деб хулоса қилинади ЎзА ахборотида.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)