Бугун, 12 февраль куни Туркманистонда президент сайловлари бўлиб ўтади. Ушбу президент сайлови республика мустақилликка эришганидан кейинги бешинчиси, сиёсий партиялардан номзодлар иштирокидаги биринчисидир, деб ёзади «ТАСС».
Давлат раҳбари лавозимига тўққиз киши, шу жумладан, амалдаги президент Гурбангули Бердимуҳаммедов даъвогарлик қилмоқда.
Ушбу янгилик мамлакат конституциясининг 2016 йил сентябрда тасдиқланган сўнгги таҳририга мувофиқ киритилди, унда кўппартиявийлик ҳақидаги қоидалар, фуқаролик жамияти ва жамоатчилик бирлашмаларини ривожлантириш учун шароитлар яратиш зарурлиги белгиланди. Президент ваколатлари муддати 5 йилдан 7 йилгача узайтирилди, президентликка номзодлар учун ёш чегараси олиб ташланди, у аввал 70 ёшни ташкил этар эди.
Республиканинг асосий қонунига киритилган ўзгартириш ва қўшимчаларни ҳисобга олиб, 2016 йилнинг 14 декабрида номзодларни сайловларда иштирок этиш учун илгари суриш бошланди, 26 декабрда эса улар Марказий сайлов комиссияси томонидан рўйхатга олинди.
Сайлов маҳаллий вақт билан 07:00 дан 19:00 гача (Тошкент вақти билан бир хил) бўлиб ўтади. Сайловларда жами 2578 та сайлов участкаси очилади, шуларнинг 39 таси Туркманистоннинг мамлакатдан ташқаридаги дипломатик миссиялари қошида очилади.
Изоҳ (0)