Ўзбекистон Туризмни ривожлантириш давлат қўмитаси раиси А. Шаропов Франциянинг Cluster Montagne уюшмаси вакиллари билан учрашув ўтказди. Бу ҳақда қўмита матбуот хизмати хабар берди.
Делегация таркибига Албервил шаҳридаги Олимпия ўйинлари уйи президенти ва минтақа бўйича маслаҳатчи Савоя Гай Севессанд, Geode компанияси бош директори Фредерик Гамара, Geode компаниясининг халқаро лойиҳалар бўйича раҳбари Уберто Эскудеро кирди.
Икки кун давомида делегация Чимённинг сайёҳлик салоҳияти билан танишиб, Чорвоқ сув омбори ва Чимён тоғларида туризмни ривожлантириш бўйича умумий тасаввурга эга бўлди.
Г. Севессанд сўзларига кўра, Чимён тоғлари пиёда сафарлар, тоғ велоспорти, ёзги вақтда парапланда парвозлар, қишки пайтда эса тоғ-чанғи спортини ташкил этиш орқали фаол ҳордиқ бўйича профессионал ва ҳаваскорларни жалб этиш учун катта салоҳиятга эга.
Гамара Чорвоқ сув омборига туташ ҳудудларнинг салоҳиятини алоҳида тилга олди ва ушбу ҳудуднинг рекреацион (ҳордиқ чиқаришга мўлжалланган) салоҳиятини ошириш бўйича улкан имкониятлар мавжудлигини таъкидлади.
Шунингдек, Ф. Гамара туризм секторига инвестициялар киритишни рағбатлантириш ҳамда ҳудуднинг сайёҳлик йўналиши сифатида тезкорлик билан ривожланиши учун ушбу ҳудудда эркин иқтисодий (ёки туристик) зона яратиш масаласини кўриб чиқиш керак, деган фикр билдирди.
Изоҳ (0)