Нурсултон Назарбоевнинг халққа мурожаати Қозоғистоннинг учинчи модернизациясига бағишлангани маълум бўлди

Қозоғистон президенти томонидан ҳар йили халққа йўлланадиган мурожаат 31 январь куни чоп этилади, деб хабар беради «Коммерсантъ».

«25 йил давомида биз икки модернизацияни амалга оширдик. Биринчиси — бозор иқтисодиёти тамойилларига асосланган буткул янги давлатнинг яралиши. Иккинчиси —‘Стратегия—2030’нинг амалга оширилиши ва пойтахт Остонанинг барпо этилиши.

Бугун дунёда технологик йўналишда юз бераётган туб ўзгаришлар иқтисодий ўсишнинг янги моделига ўтишни талаб қилмоқда. Шу сабабли халққа мурожаатим Қозоғистоннинг учинчи модернизациясига бағишланади. Бизнинг вазифамиз — мамлакатнинг янги шароитлардаги глобал рақобатбардошлилигини таъминлаш», — дея таъкидлади Нурсултон Назарбоев.

Қозоғистон президенти давлатнинг сиёсий модернизацияси ва янги технологик модернизация бир-бирини тўлдириши ва мамлакатнинг узоқ муддатли ривожланиши учун хизмат қилишини билдирди.

Нурсултон Назарбоевга кўра, мамлакат фақат шу тариқа «Стратегия—2050»нинг асосий мақсади — Қозоғистоннинг дунёнинг энг ривожланган 30 давлати қаторига киришига эришиши мумкин.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.