Жанубий Корея парламентининг тадқиқот гуруҳи БМТ собиқ раҳбари Пан Ги Мун Кореяда давлат лавозимини эгаллаши, шу жумладан, президентликка номзодини қўйиши мумкин, деган хулосага келди. Бу ҳақда «Рёнхап»га таяниб, «Газета.ru» хабар берди.
Парламентнинг махсус гуруҳи БМТ резолюциясини таҳлил қилиб чиқди. Аввалроқ Пан Ги Муннинг танқидчилари унга асосланиб, БМТ собиқ бош котиби президент лавозимига даъвогарлик қила олмаслигини айтган эди. Аммо парламент аъзолари резолюция матнида Пан Ги Муннинг сиёсатга йўлини тўсмайдиган сўзлар ишлатилганини аниқлади.
БМТ ҳужжатида, хусусан, кўпчилик мамлакатларнинг ишончли вакили сифатида чиқиш қилган ташкилот собиқ бош котиби ҳукумат лавозимини эгалламаслиги мақсадга мувофиқ эканлиги қайд этилади.
Жанубий Корея парламентидагилар қўшимча қилишича, агар Пан Ги Мун президентликка ўз номзодини қўйишга қарор қилса, унинг аввалги иш тажрибаси унинг мамлакати манфаатларига салбий таъсир қилмаслигини исботлашига тўғри келади.
Изоҳ (0)