Германиянинг Шлотайм шаҳрига қарашли JFL-Schlotheim мактаби билан ҳамкорликда Тошкентда футбол мактаби очилади. Бу ҳақда «Championat.asia» нашри маълумот берди.
Мактаб учта ёш тоифасида фаолият олиб боради: U11 (2006), U10 (2007/08) ва U9 (2009/10). Ҳар бир гуруҳга 23 нафардан бола қабул қилинади ва уларнинг 20 нафари шартнома асосида фаолият олиб боради. Уч нафари эса мактаб фонди асосида қабул қилинади.
Европа методикасига кўра, бу ерда болани аввало етук инсон бўлиб етишиши учун урғу берилади. Мактаб мураббийлари баҳор ва ёз ойларида Германияда малакасини ошириб қайтади. Бу вақтда германиялик мураббийлар уларнинг ўрнида Тошкентда машғулот ўтказади. Уларда махсус шифокор иштирок этиб, боланинг саломатлигини назорат қилади.
JFL-Tashkent футбол мактаби инглиз ва немис тилларини ўргатиши билан фарқ қилади. Унда мактаб фанлари жиддий назорат қилинади. Режага кўра, мактаб ўқувчиларни 15 февраль санасидан бошлаб қабул қилади.
Компаниянинг Тошкентдаги филиали асосчиларидан бири Дилшод Қориев база масаласи деярли ҳал бўлгани ҳақида айтиб, унинг қаерда жойлашганини сир сақлаган. Қориевнинг ишонтириб айтишича, базадаги шарт-шароитлар ота-оналарни қувонтиради.
Европада фарзандингизни футбол мактабига олиб борсангиз, унинг футболчи бўлиб етишишига юз фоиз кафолат берилмайди. Аммо болангизнинг бошқа фанлардан қолиб кетмаслиги, кун келиб бошқа касбни танламоқчи бўлса, қийинчиликсиз ўша соҳада давом этишини таъминлайди. Чунки улар ёш футболчига ўз фарзанди сифатида қарайди. Биз ҳам шу методикани қўллашни ният қилаяпмиз.
Бизга келган болакай футболдан ташқари мактабнинг бошқа фанларини ҳам мукаммал билсин. Дейлик, 16 ёшли боладан футболчи чиқмади. Аммо у камида немис ва инглиз тилини билади, рус тилида гаплашади. Агар биз Германия методикасини тўлиқ ўзлаштириб олсак, йиллар ўтиб олий лигамизда бизнинг мактабдан чиқадиган кўп футболчиларни кўришимиз мумкин бўлади. Ишимиз самарасини яқин 6 йилда кўрамиз.Дилшод Қориев, JFL-Tashkent асосчиларидан бири
Изоҳ (0)