Inverse нашри жаҳоннинг барча катта шаҳарлари орқали ўтадиган метрополитен чизмасини эълон қилди. «1news.uz»нинг ёзишича, чизмада кўрсатилган шаҳарлар орасида Ўзбекистон пойтахти Тошкент ҳам бор.
Hyperloop компанияси бутунлай янги транспорт тури — вакуум поездларини яратиш устида ишламоқда. Бундай поездларнинг йўналишлари метро каби ер остидан ўтади, бироқ янги транспорт махсус вакуумли капсулаларда жуда катта тезликда ҳаракатланиш имконига эга бўлади.
Ғоя муаллифи америкалик миллиардер Илон Маск бўлиб, у ғояни амалга ошириш бўйича ҳали аниқ бир ечимни топа олганича йўқ.
Жорий йил бошида Inverse нашри инновацион лойиҳани ривожлантириш жараёни ҳақида ҳикоя қилувчи мақолани тақдим этди. Яқин беш йил ичида Hyperloop мутахассислари дастлабки учта йўналишни қуриш учун мос келувчи ҳудудни танлайди.
Кейинроқ нашр «Глобал метронинг харитаси келажак Hyperloop билан қандай кўринишга эга бўлишини кўрсатмоқда» номли мақолани эълон қилди.
Мақолада ёзувчи Марк Оведен томонидан 2003 йилда, вакуумли поездни назарда тутмаган ҳолда ўйлаб топилган йўналишлар чизмаси берилган.
Ёзучи ўз харитасида метрополитен бўлган ва яқин вақт ичида метрополитен қурилиши режалаштирилган шаҳарларни бирлаштирган. Тошкент ҳам бу харитадан жой олган.
Эълон қилинган чизмада Тошкент орқали бирданига тўртта йўналиш ўтишини кўриш мумкин.
Биринчи йўналиш орқали Тошкентдан Хитой, Япониягача, иккинчи йўналиш орқали Вьетнам ва Ҳиндистонга, учинчи йўналиш орқали Озарбайжон, Арманистон, Туркия, Исроил, Мисрга, тўртинчи йўналиш орқали эса Қозоғистон ва Россияга бориш имкони мавжуд бўлади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)