Ассанж АҚШга таслим бўлиш ҳақидаги ваъдасини бузди

WikiLeaks асосчиси Жулиан Ассанж АҚШ расмийларига таслим бўлмайди. Бу ҳақда адвокатлари AP’га маълум қилди, деб хабар беради Meduza.

2016 йил сентябрида Ассанж АҚШга келишга ва таслим бўлишга ваъда берган эди. Яқинда WikiLeaks твитларининг бирида ушбу ваъда яна такрорланди.

Таслим бўлишнинг асосий шарти сифатида АҚШнинг собиқ ҳарбий хизматчиси, WikiLeaks’га маълумот етказгани учун ҳибсга олинган Челси Мэннингни афв этиш кўрсатилган эди.

Ушбу твитдан олти кун ўтиб, 17 январь куни Барак Обама Мэннингга белгиланган жазо муддатини камайтириш ҳақидаги фармонни имзолади.

Аммо, WikiLeaks вакили Барри Поллак ва Ассанжнинг адвокати Мелинда Тейлор гап Меннингни дарҳол озод қилиш ҳақида кетганини, шу боис Ассанж АҚШга бормаслигини маълум қилди.

Мэннинг афв этилгач, WikiLeaks’нинг Twitter’даги саҳифасида Ассанж АҚШга фақатгина барча ҳуқуқлари кафолатланган тақдирда бориши ҳақидаги ёзув пайдо бўлди.

Айтилишича, ўз твитларида Ассанж президент фармони билан жазо мухлатини қисқартиришни англатувчи clemency атамасини ишлатган. Дарҳол озод қилиш йўли билан афв этиш pardon атамаси билан юритилади.