Ҳозирда Ўзбекистонда 2130 номдаги дори-дармон ишлаб чиқараётган 145 фармацевтика корхонаси фаолият кўрсатмоқда. Ўтган йил якуни натижаларига кўра, маҳаллий дори воситаларининг мамлакат ички бозоридаги улуши 55 фоизни ташкил этди. Бу ҳақда «Дарё» мобил мухбири хабар бермоқда.
Маҳаллий компаниялар нафақат ички бозор, балки экспорт учун ҳам маҳсулотлар ишлаб чиқармоқда. Ўзбекистонда ишлаб чиқарилаётган 100 дан ортиқ номдаги дори-дармон ва тиббиёт буюмлари дунёнинг 20 га яқин давлати, жумладан, Европа Иттифоқи ва АҚШга экспорт қилинмоқда.
Ўзбекистон Республикаси Президентининг «Аҳолини дори-дармон воситалари ва тиббиёт буюмлари билан таъминлашни янада яхшилашга доир чора-тадбирлар тўғрисида»ги қарорига мувофиқ, жорий йил 1 январдан бошлаб дори-дармон воситалари ва тиббиёт буюмларини улгуржи савдо учун сотиб олинган қийматидан 15 фоиздан, чакана савдо учун улгуржи нархидан 20 фоиздан ортиқ бўлмаган миқдорларда белгиланадиган чекланган савдо устамалари қўлланилган ҳолда амалга оширилади. Шу тариқа республиканинг ҳар бир фуқаросига, моддий ҳолати ва яшаш жойидан қатъи назар, зарур дори-дармон воситалари ва тиббиёт буюмларини харид қилиш имконияти яратилмоқда.
Шунингдек, 1 январдан эътиборан 300 дан ортиқ номдаги дори-дармон воситалари учун белгиланган нарх ўрнатилмоқда. Дори-дармон воситалари сифати назорати бош бошқармаси бошлиғи М. Иброҳимовага кўра, мазкур рўйхатга аҳоли учун энг аҳамиятли, жумладан, саратон, қанд касалликларига қарши, операциялар ўтказиш учун зарур дорилар киритилди. Ушбу препаратлар барча тиббиёт муассасалари ва дорихоналарда, етарли миқдорда, сифати тасдиқланган ва қулай нархларда бўлиши лозим.
Мазкур чоралар биринчи галда аҳолини сифатли ва нархи қулай дори-дармон ҳамда тиббиёт буюмлари билан таъминлаш, шунингдек, фуқаролар саломатлигини мустаҳкамлашга қаратилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)