Ўзбекистон миллий термасига номзод бўлган етти нафар футболчи жамоанинг ЖЧ—2018 йўлидаги 3 та рақибига қарашли клублар томонидан қўлга киритилди: Одил Аҳмедов, Сервер Жепаров, Сардор Рашидов, Анзур Исмоилов, Егор Кримец, Санжар Турсунов ва Темурхўжа Абдухолиқов.
ЖЧ—2018 саралашида Ўзбекистон терма жамоаси 9 очко билан ўз гуруҳида 3-ўринни эгаллаб турибди. Унда пешқадамлик қилаётган Эроннинг «Истиқлол» клуби Сервер Жепаровни ўз сафига қўшиб олди. Ўзаро ўйинларда Ўзбекистон терма жамоасига имкониятни бой берган Қатар ва Хитой клубларида эса уч нафардан ўзбекистонлик футболчи тўп суради.Сервер Жепаров — «Истиқлол» (Эрон)
Одил Аҳмедов — «Шанхай СИПГ» (Хитой)
Анзур Исмоилов — «Чанчун Ятаи» (Хитой)
Егор Кримец — «Бейцзинг Гоан» (Хитой)
Сардор Рашидов — «Ал-Жаиш» (Қатар)
Темурхўжа Абдухолиқов — «Ас-Сайлия» (Қатар)
Санжар Турсунов — «Ал-Ҳарайтият» (Қатар)
Хитой Супер лигасида легионер футболчилар сонига бўлган чеклов янада кучайтирилгани, чемпионатда тўп сураётган осиёлик футболчиларга таъсир ўтказиши мумкин экани хабар қилинганди. Давом этаётган Қатар Юлдузлар лигасида эса Сардор Рашидов ва Санжар Турсунов жамоасининг асосий футболчилари ҳисобланади.
Бироқ Самвел Бабаян Санжар Турсуновга эътибор қаратадими ёки йўқ — аниқ эмас. Узоқ танаффусдан кейин терма йиғинига жалб қилинган Темурхўжа Абдухолиқовнинг эса Бабаян қўл остида машғулот ўтказиши яна узоқроққа чўзиладиган бўлди. Боиси у эндигина Қатарга етиб борди.
Изоҳ (0)