Роналду трансфер бозоридаги талабгир «маҳсулот» — Хамес Родригесга «Челси»га ўтмасликни маслаҳат берди

«Реал» ҳужумчиси Криштиану Роналду жамоадоши Хамес Родригесни Лондоннинг «Челси» клубига ўтишдан қайтарди, деб хабар бермоқда Marca.

Лондон клуби «Реал»да етарлича ўйин амалиётига эга бўлмаётган Хамес учун «Қироллик клуби»га 90 миллион евро таклиф қилишни режалаштирганди. Колумбиялик 25 ёшли футболчига қарор қабул қилиш учун 7 кун муҳлат берилганди, аммо Роналду Хамесни «Реал»да қолишга кўндирди.

• Audi’даги Хамес Bugatti ҳайдаб кетаётган Роналдуга йўл бермади (видео)

«Реал» бош мураббийи Зинедин Зидан колумбиялик футболчига уни олиб қолиш истаги бор эканини айтганди.

Мен Хамес билан гаплашиб, унинг «Реал»да – дунёнинг энг яхши клубида қолишини хоҳлаётганимни айтдим.

Зинедин Зидан, «Реал» бош мураббийи

Колумбиялик футболчи «Севилья»га қарши (3:0) 5 январга ўтар кечаси Испания Кубоги 1/8 финал илк ўйинида майдонга тушиб, 2 та голга муаллифлик қилганди. Шундан кейин Хамес «Реал»да қолиши ҳақида маълум қилганди.

«Реал»да ҳамма ўйин амалиётига эга бўлишни истайди. Ҳаммада омадсиз давр бўлади, лекин мен учун янги йил бошланди. Мен «Реал»да қоламан.

Хамес Родригес, «Реал» ярим ҳимоячиси

• Marca сўровномасида иштирок этган 29 минг кишининг 59 фоизи «Реал» Хамес Родригесни сотиши керак деб ҳисоблайди

Бир неча кун аввал Хитойнинг «Хебей Чайна Форчун» клуби Хамес учун «Реал»даги йиллик маошидан қарийб 10 баробар кўпроқ – 30 миллион евро таклиф қилгани ҳақида хабарлар пайдо бўлди. Лекин колумбиялик футболчи таклифни рад этгани таъкидланди. Ҳозирда у мадридликлар сафида йилига 3,5 миллион евро олади.

Қайд этиш жоиз, «Хебей Чайна Форчун» жамоаси «Барселона» етакчиси Лионель Месси учун йилига 100 миллион евро таклиф қилганди. Бироқ «Хебей Чайна Форчун» Хамес ва Мессига қизиқаётгани ҳақидаги хабарлар ҳақиқатдан йироқ эканини маълум қилди.

Аввал биз Мессига, кейин Хамесга қизиқаётганимиз ҳақида хабарлар пайдо бўлди. Кейинги нишонимиз ким бўлади? Криштиану Роналду-ми? Катта сарлавҳалар тайёрлашда бизнинг номимизни ишлатишни тўхтатинглар.

«Хебей Чайна Форчун» баёноти

Маълумот учун, Хамес Родригес жорий мавсумда Испания чемпионатининг атиги 9 ўйинида, шулардан 4 тасида асосий таркибда майдонга тушиб, 1 та гол ва 3 та голли узатмага муаллифлик қилди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.