Нидерландияда барча поездлар шамол энергиясида ҳаракатланадиган бўлди

Нидерландияда 2017 йилдан бошлаб барча поездлар шамол ёрдамида олинувчи энергия орқали ҳаракатланмоқда. Бу ҳақда Meduza хабар бермоқда.

Бир йил аввал шамол электр станциялари шарофати билан мамлакатдаги поездларнинг учдан икки қисми электр қуввати билан таъминланган эди.

Нидерландияликлар бу йил эмас, балки 2018 йилда барча поездларни шамол энергияси билан тўлиқ таъминлашни режалаштирган эди.

Бироқ улар, мамлакатда янги электр станциялари қуриш ҳисобига, режани муддатидан аввал бажарди. Нидерландия авваллари электр энергиясини қўшни мамлакатлардан сотиб оларди.

Мамлакатнинг йўловчи ташиш бўйича энг йирик компанияси ҳисобланган Nederlandse Spoorwegen ҳар куни деярли 600 минг йўловчини ўз манзилига элтиб қўяди.

Маълумот ўрнида, жаҳон бўйича энг кўп шамол энергияси ишлаб чиқарувчи давлат Хитойдир.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.