Алишер Навоий номидаги Давлат академик катта театри жамоаси Янги йил арафасида болалар ва уларнинг ота-оналарини «Катта театрда суперқаҳрамонлар» номли мусиқий эртак билан хурсанд қилмоқда. Мазкур саҳналаштирилган Янги йил томошаси 11 январга қадар намойиш этилади, деб ёзади «Darakchi.uz».
Жажжи томошабинлар томоша аввалидаёқ катта арча остида жойлашган ва мева, сабзавотларнинг баҳайбат тасвири акс этган ноодатий декорация билан безатилган «Арча-сити»нинг сеҳрли атмосферасига ғарқ бўлади.
Томошанинг асосий қаҳрамони Тарвузмен ҳисобланади. У қувноқ, жасур ва кучли. Тарвузмен катта арча остидаги шаҳарни ёвуз қаҳрамонлар Бақлажон ва Робот ўтинчилардан ҳимоя қилади. Шунингдек, болажонлар Тандир-ботир ва албатта Қорбобони ҳам кўради.
«Мусиқий эртакни саҳналаштиришдан мақсад дўстларсиз муаммоларни ҳал қилиб бўлмаслиги ва ҳатто махсус костюмлар киймасдан ҳам қаҳрамон бўлиш мумкин, деган ғояни илгари суриш эди. Менинг эртагим болаларга шуни ўргатади. Спектаклда рол ижро этган ҳар бир актёр ўз вазифасини аъло даражада уддалади», — дейди спектакль муаллифи ва режиссёри Руслан Шерезданов.
«Ўзбекистонда комикслар мавзуси унчалик оммабоп эмас, бироқ Бетмен, Супермен, Ўргимчак одам, Халк каби суперқаҳрамонлар ҳақида ҳамма билади. Мен ҳам бошқаларга ўхшамайдиган, ўзимизнинг суперқаҳрамонимизни яратишга қарор қилдим. Тарвузмен ғояси шу тарзда туғилди», — деди спектакл режиссёри.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)