АҚШ ҳукумати мамлакатдан чиқариб юбораётган рус дипломатлари Россияга учиш учун чипта харид қилишда муаммоларга дуч келмоқда. Бу ҳақда «Интерфакс» хабар берди.
«Чипталар йўқ, Янги йил олдидан сотиб бўлинган. Уларга эса мамлакатдан чиқиб кетиш учун атиги 72 соат муҳлат берилди. Бадарға қилинаётган дипломатлар Вашингтондан Москва рейсига бўш жой топиш имконияти юқорироқ Нью-Йоркка боришга мажбур бўлмоқда. Улар Янги йилни самолётда кутиб олишига тўғри келади. Бу кутилмаган янгилик бўлди, дипломатлар байрамни нишонлашга тайёргарлик кўраётганди», — дея маълум қилди агентликка ўзини ошкор этишни истамаган манба.
Бошқа бир манбага кўра, Россиянинг Нью-Йоркдаги ваколатхонаси дала ҳовлиси олдида полиция ходимлари тўпланаётгани кузатилмоқда. «Бу қуршов эмас, албатта, вертолётлар учмаяпти, лекин барибир кишига таъсир қиладиган ҳолат», — деб таъкидлади манба.
Эслатиб ўтамиз, 29 декабрь, пайшанба куни АҚШ Давлат департаменти 35 нафар россиялик дипломатни «персона нон грата» — мамлакатда бўлиши исталмаган шахс деб эълон қилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)