АҚШ Давлат департаменти 35 нафар россиялик дипломатни «персона нон грата» — мамлакатда бўлиши исталмаган шахс деб эълон қилди, деб ёзади «РБК» муассаса хабарига таяниб. Баёнотга кўра, улар «ўзларининг дипломатик ёки консуллик мақомига мос бўлмаган тарзда» фаолият юритган.
Бундай чоралар «Россиянинг АҚШдаги сайловларга аралашуви», шунингдек, америкалик дипломатларнинг доимий равишда хорижда «таъқиб этилиши»га жавоб сифатида қабул қилинди.
Давлат департаменти маълумотларига кўра, АҚШ дипломатларининг «таъқиб қилиниши» сўнгги тўрт йил ичида «ўсган», сўнгги 12 ойда эса «кескин ўсиш»ни кўрсатган.
Reuters хабарига кўра, Вашингтондаги элчихона ва Сан-Францискодаги консулхона ходимлари мамлакатдан чиқариб юборилади, уларга АҚШни тарк этиш учун 72 соат вақт берилган. Аммо бу чора Россиянинг АҚШдаги элчиси учун амал қилмайди.
Шунингдек, АҚШ ҳукумати Россия дипломатик миссияларининг Нью-Йорк ва Мэрилендда шаҳар ташқарисидаги иккита қароргоҳини ёпади. Ушбу бинолар, Reuters манбаларига кўра, «разведка маълумотлари»ни тўплаш учун қўлланилган.
Изоҳ (0)