Бокс бўйича -64 килограмм вазнда Рио–2016 Олимпия ўйинлари чемпионига айланган Фазлиддин Ғоибназаров «Qalampir.uz» сайтига берган интервьюсида унинг нотаниш қиз билан сурати тарқалганини кўпроқ эркаклар ғийбат қилгани ҳақида айтиб ўтди.
«Риодан эндигина келган кунларимиздан бири эди. Ёнимга бир қиз келиб, мухлис эканини айтди ва суратга тушишни илтимос қилди. Мен унга йўқ дея олмай, суратга тушишга рози бўлдим. Ўша вақтда вазият бундай тус олишини ким ҳам ўйлабди дейсиз? Бир неча кундан кейин бутун ижтимоий тармоқ ана шу суратни муҳокама қила бошлади. Ўйлашимча, одамлар орасида ғийбат қилишга гап топилмай турган экан шекилли, ҳамма шу суратга ёпишиб олди», – деди Ғоибназаров.
«Мен ўшанда аёлларимизнинг мардлигига қойил қолдим. Ўша қиз билан тушган суратимиз тарқалгач, ижтимоий тармоқдаги саҳифамга эркаклар турли ёқимсиз изоҳларни ёзиб қолдирган бир пайтда, аёлларнинг бунга ғаши келди. Улар, ‘Бу юлдуз, бу эса мухлис’ қабилида, эркак бўла туриб эркакни ғийбат қилаётган инсонларга ортиқча изоҳга ўрин йўқлигини исботлашди», – қўшимча қилди боксчи.Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)