Тошкентдаги Лабзак кўчасининг «Анҳор-Локомотив» парки олдидан ўтган, Зулфияхоним ва Абдулла Қодирий кўчалари оралиғидаги қисми ёпилган. Бу ҳақда Facebook’даги «Водители Ташкента» гуруҳида хабарлар қолдирилган.
Хабар беришларича, Лабзак кўчасининг Зулфияхоним ва Абдулла Қодирий кўчалари оралиғидаги қисми тўлиқ ёпилган. Ҳайдовчиларнинг маълум қилишича, катта эҳтимол билан, йўл Янги йил тантаналаридан кейин очилиши мумкин.
Айни вақтда, Лабзакка қўшни кўчалар ва яқин чорраҳаларда тирбандликлар кузатилаётгани ҳақида хабарлар қолдирилмоқда. Хусусан, Абай ва Абдулла Қодирий, Абай ва Навоий кўчалари кесишган чорраҳаларда катта тирбандликлар юзага келган.
Фойдаланувчиларнинг қўшимча қилишича, нафақат «Анҳор-Локомотив» парки яқинидаги йўл, балки байрам арчалари ўрнатилган бошқа майдон ва хиёбонлар яқинидаги, хусусан, ROISON заводи олдига ўрнатилган арча олдидаги йўл ҳам ёпилган, ҳайдовчилар айланиб ўтишга мажбур бўлмоқда.
Маълумот учун, Тошкентда 2017 йил кириб келишига бағишланган асосий Янги йил тантаналари бўладиган жой Мустақиллик майдонидан «Анҳор-Локомотив» паркига кўчирилган эди. Қайд этиш жоиз, Янги йил тантаналари Мустақиллик майдонида ўтказилган йилларда майдон олдидан ўтган Рашидов кўчасининг бир қисми транспорт ҳаракати учун ёпилар эди.
Тошкент шаҳридаги майдон ва хиёбонларда 27 декабрдан Янги йил томошалари бошланди. Эътиборли томони, Тошкент шаҳар ҳокимлиги байрам сайллари вақтида шаҳарнинг баъзи кўчалари ёпилиши ҳақида олдиндан огоҳлантириш бермаган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)