Футбол бўйича Ўзбекистон Олий Лигасида чемпионликни қўлга киритган жамоага 2017 йилги мавсумдан бошлаб кубок топширилади. Бу ҳақда мамлакат Профессионал Футбол Лигаси раҳбари Фарҳод Магомедов янги мавсумга қуръа ташлаш маросими вақтида айтиб ўтди, деб ёзди «Championat.asia».
2016 йил Ўзбекистон Кубогида зафар қучган Тошкентнинг «Локомотив» клубига янги кўринишдаги кубок топширилганди. Эндиликда мамлакат чемпиони ҳам кубокли бўлади.
Фарҳод Магомедовнинг сўзларига кўра, янги кубоклар ЎФФ президенти Мираброр Усмоновнинг ёрдами билан олиб келинган:
«ЎФФ президенти ёрдамида иккита янги кубок олиб келинди. Энди улар доимий равишда ғолибларга топширилади. Иккала кубок ҳам қиммат металлардан ясалган», — деб таъкидлаган Магомедов металнинг қандай эканига ҳам, унинг қайси мамлакатдан келиб қолганига ҳам ойдинлик киритмаган.
Фарҳод Магомедов мамлакат чемпионлиги ва кубогини қўлга киритган жамоаларга пул мукофоти топширилиши масаласига ва табиийки, топширилса унинг қанча миқдорда бўлишига ойдинлик киритмаган.
Ўзбекистон Олий Лигасининг 2016 йилги мавсумида Тошкентнинг «Локомотив» футбол клуби ўз тарихида илк бор чемпионликни қўлга киритганди. Мамлакат кубоги ҳам айнан унинг ўзига насиб қилди.
Изоҳ (0)