Футбол бўйича Ўзбекистон Суперкубоги учун ўйин бўлмайди. Бу ҳақда мамлакат Профессионал Футбол Лигаси раҳбари Фарҳод Магомедов 2017 йилги мавсум учун қуръа ташлаш маросимида айтиб ўтди.
«2017 йил Суперкубок ўйини ўтказилмайди. Чунки ‘Локомотив’ ҳам чемпион бўлди, ҳам кубокни олди. Шу боисдан ўйинга қизиқиш бўлмаса керак», — деб айтиб ўтган Фарҳод Магомедов.
ПФЛ раҳбари Олий Лига ёки Ўзбекистон Кубогининг қизиқиш катта бўлмаган ўйинлари ўтказилиши ёки йўқлиги борасида фикр билдирмаган. Ўзбекистон Суперкубогига қизиқиш бўлмайди деб ўйлашга нима сабаб бўлгани ҳам очиқланмаган.Қайд этиш керак, 2016 йилги Ўзбекистон Суперкубоги Ўзбекистон футзал термасининг Жаҳон Чемпионатига йўл олиши масаласини ҳал қиладиган Ироққа қарши ўйини куни, аниқроғи, 2016 йилнинг 17 февраль санасида бўлиб ўтганди. Ўша куни Ўзбекистон — Ироқ ўйини учун чиқарилган барча чипталар сотилиб, «Ўзбекистон» мажмуасига кира олмай қолган мухлислар ҳам топилган. «Бунёдкор» стадионида бўлиб ўтган Суперкубок ўйинида эса стадионнинг ўндан бири ҳам тўлмаган.
Маълумот учун, Ўзбекистон Профессионал Футбол Лигаси 2017 йилги мавсум учун регламент тузиб чиқмаган. Шунга қарамай, чемпионат учун қуръа ташлаш маросимини ўтказиб улгурди. Ташкилот раҳбари эса Суперкубокни регламентга асосланмасдан йўқ қилди. Аниқроғи, регламент катта эҳтимол билан шу қарор асосида ўзгартирилади.
ПФЛнинг 2016 йилги мавсум учун тузилган регламентида мамлакат чемпионлиги ва кубоги 1 та жамоага насиб қилса, у ҳолда Суперкубок учун олтин ва кумуш медални қўлга киритган жамоалар кураш олиб бориши кўрсатилган.
2016 йилги мавсум аввалида Ўзбекистон Суперкубоги учун беллашув ўтказилиб, унда мамлакат чемпиони «Пахтакор» Ўзбекистон Кубоги ғолиби «Насаф»га қарши майдонга тушганди. Беллашувда Артур Геворкян томонидан урилган ягона гол «Насаф»га ғалаба келтирганди. Ундан олдинги мавсум эса «Локомотив» Суперкубок ўйинида «Пахтакор» дарвозасига 4 та гол урганди.
Регламент бўйича 2017 йилги мавсумда ҳам Суперкубок ўйини ўтказилганида, унда «Локомотив» ва «Бунёдкор» клублари ўзаро тўқнаш келиши керак эди.
Изоҳ (0)