Пентагон Хитой ҳукуматидан Жанубий Хитой денгизида қўлга олинган сув ости учувчисиз қурилмасини қайтариб беришни талаб қилди, деб ёзади «Интерфакс».
Пентагон вакили Жефф Дэвис маълум қилишича, унинг Америкага тегишли қурилма эканлигини унга туширилган белгилардан яққол билиш мумкин. АҚШ уни ўзига қайтариб олмоқчи ва келажакда бундай ҳолатлар такрорланиши олдини олмоқчи.
Ҳодиса 15 декабрь, пайшанба куни АҚШнинг сайланган президенти Дональд Трампнинг Тайвань статуси ва бирдам Хитой сиёсатига нисбатан билдирган фикрлари фонида юз берди. Бундан ташқари, Трамп сайланган президент сифатида Тайвань раҳбаридан телефон қўнғироғини қабул қилиб, дипломатик протоколнинг муҳим деталини бузди. Бу Хитойнинг ташқи сиёсати бўйича энг нозик масалалардан бирини кўтаради.
Шунингдек, Вашингтондаги таҳлилий хизматлардан бири Хитой Жанубий Хитой денгизининг баҳсли ҳудудига ҳаво ҳужумига қарши қуролларни ўрнатганини маълум қилди.
Пентагон матбуот котиби Питер Кук дронни АҚШнинг суверен мулки, унинг қўлга олинишини эса ноқонуний деб атади. Шу муносабат билан АҚШ давлат департаменти расмий норозилик билдирди ва уни дипломатик каналлар орқали Хитой томонига берди.
Ҳодиса 15 декабрь куни Жанубий Хитой денгизидаги халқаро сувларда «Боудич» тадқиқот кемаси экипажининг кўз ўнгида содир бўлди. Океаншунослар Субик-Бей (Филиппин) кўрфазидан тахминан 100 км масофада тўхтаган ва ўзининг иккита сув ости дронини кўтармоқчи бўлган. Шу пайтда АҚШ кемасини бир неча кун давомида тўхтовсиз таъқиб қилган хитойликлар сувга қайиқ тушириб, қурилма ёнига сузиб борган ва уни олиб кетган.
Изоҳ (0)