Мирзиёев ва Эрдўғон ўртасидаги мулоқотда ўзаро ҳамкорликни янада мустаҳкамлашга тайёрлик билдирилди

Ўзбекистон Республикасининг сайланган Президенти Шавкат Мирзиёев билан Туркия президенти Ражаб Тоййиб Эрдўғон ўртасида Туркия томонининг ташаббуси билан телефон орқали мулоқот бўлиб ўтди. Бу ҳақда ЎзА хабар бермоқда.

Эрдўғон Шавкат Мирзиёевни Ўзбекистон Республикаси Президенти сайловида ишончли ғалаба қозонгани билан самимий табриклади.

Давлат раҳбарлари давлатлараро муносабатларнинг долзарб масалаларини муҳокама этди ва 18 ноябрда Самарқандда олий даражада ўтган Ўзбекистон — Туркия ўртасидаги серқирра мулоқот ва ўзаро манфаатли ҳамкорликни янада мустаҳкамлаш ва кенгайтиришга тайёр эканини таъкидлади.

Туркия раҳбари Туркия делегациясининг Ўзбекистонга ташрифи давомида самимий қабул ва меҳмондўстлик учун миннатдорлик билдирди.

Томонлар бугунги икки томонлама муносабатлар ўзбек ва турк халқларининг тарихи ҳамда маънавияти муштараклигининг мустаҳкам асосига таяниши ва ўзаро манфаатларга жавоб берадиган амалий натижаларга эришишни мақсад қилганини алоҳида таъкидлади.

Ўзбекистон билан Туркия шериклик муносабатларини иқтисодий, инвестицион-технологик, маданий-гуманитар ва бошқа соҳалардаги улкан салоҳият инобатга олинган ҳолда, янги мазмун билан бойитиш тарафдори экани қайд этилди.

Томонлар ташқи сиёсат маҳкамалари, вазирликлар ва иқтисодий тузилмалар ўртасида алоқаларни фаоллаштиришдан манфаатдор. Шу муносабат билан яқин вақт ичида Савдо-иқтисодий ҳамкорлик бўйича ҳукуматлараро комиссиянинг навбатдаги мажлисини ўтказиш тўғрисида келишиб олинди.

Суҳбат чоғида Самарқандда ўтказилган учрашувда эришилган келишувларга мувофиқ Туркиянинг етакчи компаниялари иштирокида ўзаро манфаатли инвестиция лойиҳаларини амалга ошириш учун муайян соҳалар белгиланди.

Ўзбекистон ва Туркия раҳбарлари ўзаро расмий ташриф алмашишга келишиб олди ва шу муносабат билан манфаатдор вазирлик ва идораларга тегишли топшириқлар берилди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.