Шавкат Мирзиёев 2 декабрь куни «Буюк давлат ва сиёсат арбоби, Ўзбекистон Республикасининг Биринчи Президенти Ислом Абдуғаниевич Каримов сиймоси тасвирланган ҳайкални яратиш бўйича халқаро ижодий танловни ташкил этиш тўғрисида»ги Президент қарорини имзолади. Қарор матни 6 декабрь, сешанба куни ЎзА томонидан эълон қилинди.
Қарор «халқимизнинг самимий истаклари ва хоҳиш-иродасидан келиб чиққан ҳолда, она Ватанимиз тараққиёти, эл-юртимиз манфаати йўлидаги унутилмас буюк тарихий хизматларини инобатга олиб, Ўзбекистоннинг Биринчи Президенти, Ўзбекистон Қаҳрамони Ислом Абдуғаниевич Каримовнинг хотирасини абадийлаштириш мақсадида» қабул қилинган.
«Мустақил Ўзбекистон давлатининг асосчиси, буюк давлат ва сиёсат арбоби, ўзбек халқининг улуғ ва ардоқли фарзанди, мамлакатимизнинг Биринчи Президенти Ислом Абдуғаниевич Каримов Ватанимизни узоқ йиллар давом этган мустабид тузум қарамлигидан озод қилиб, ҳалокат ёқасига келиб қолган юртимизни қайта тиклади. Буюк Йўлбошчимиз ғоят оғир ва таҳликали вазиятда турли қийинчилик ва машаққатларга қарамасдан, тарихан қисқа давр мобайнида Ўзбекистонни жадал ва барқарор суръатлар билан ривожланиб бораётган замонавий демократик давлатга айлантирди. Ўзбекистоннинг Биринчи Президенти ўзининг серқирра сиёсий фаолияти, олижаноб инсоний фазилатлари билан Ватанимизнинг кўп асрлик тарихида ўчмас ва ёрқин из қолдирди. У нафақат Ўзбекистон, балки бутун жаҳон миқёсида катта ҳурмат ва обрў-эътиборга сазовор бўлган улкан шахс ва арбоб сифатида танилди», — дейилади қарорнинг кириш қисмида.
Қарорда қайд этилишича, халқаро танловни ўтказиш ҳақидаги таклиф билан Ўзбекистон Бадиий академияси, Маданият ва спорт ишлари вазирлиги, Тошкент шаҳар ҳокимлиги, Фанлар академияси, Республика Маънавият тарғибот маркази, Ёзувчилар уюшмаси ва кенг жамоатчилик чиқиш қилган ва бу таклиф маъқулланган.
Қарорга мувофиқ, Ўзбекистоннинг Биринчи Президенти Ислом Абдуғаниевич Каримов сиймоси тасвирланган ҳайкални яратиш бўйича Халқаро ижодий танловга тайёргарлик кўриш ва уни ўтказиш бўйича ташкилий қўмита тасдиқланган ва унга Ўзбекистон бош вазирининг ўринбосари Абдулла Арипов раҳбар этиб тайинланган.
Ташкилий қўмита 15 кун муддатда халқаро танловнинг тадбирлар режаси, харажатлар сметаси, низоми, регламенти ва дастурини ишлаб чиқиши ва тасдиқлаши кўзда тутилган. Шунингдек, Ташқи ишлар вазирлигига танлов ҳамда унда иштирок этиш тартиби тўғрисидаги маълумотларни хорижий ижодий ташкилотларга 20 кун муддатда етказиш ҳақида кўрсатма берилган.
Қарорда қайд этилишича, Ўзбекистон Бадиий академиясининг буюртманомаларига биноан халқаро танлов доирасида хорижий давлатлардан келтириладиган юклар божхона тўловларидан озод қилинади, танловнинг хорижий қатнашчиларига кириш визалари консуллик ва бошқа йиғимлар ундирилмасдан расмийлаштирилади, «Ўзбекистон ҳаво йўллари» миллий авиакомпанияси эса танловнинг хорижий қатнашчилари ва унга алоқадор юкларни тўловларнинг барча турларидан озод қилади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)