Бразилия футбол федерацияси Колумбиядаги авиаҳалокат муносабати билан мамлакат чемпионатининг сўнгги тур учрашувларини 11 декабрга қолдирди. Бу ҳақда федерация матбуот хизматига таяниб, «ТАСС» хабар бермоқда.
Боливиядан Колумбиянинг Медельин шаҳрига учаётган Lamia самолёти 29 ноябрга ўтар кечаси Ла-Унён шаҳри яқинида ҳалокатга учради. Ҳаво кемаси бортида 72 йўловчи ҳамда 9 нафар экипаж аъзоси бўлган. Самолёт ичида футбол бўйича Бразилия А сериясида ҳаракат қилаётган «Шапекоэнсе» клубининг 27 футболчиси бўлгани ҳам хабар қилинганди.
«‘Шапекоэнсе’ клубининг мудҳиш ҳодиса муносабати билан Бразилия футбол федерацияси етти кунлик расмий мотам эълон қилиб, ушбу кунларга белгиланган учрашувларнинг қолдирилиши ҳақида маълум қилади», – дейилади хабарда.
Бразилия чемпионатининг 38-тур учрашувлари, Бразилия Кубоги ўйини ҳамда ёшлар ўртасидаги Бразилия Кубоги финал беллашуви қолдирилади.
«Шапекоэнсе» футболчилари 1 декабрь куни Копа Судамерикано – Жанубий Америка минтақаси клублари ўртасидаги Копа Либертадорес турниридан кейин нуфузи жиҳатдан иккинчи ўринда турадиган мусобақаси доирасида «Атлетико Насьонал» клубига қарши майдонга тушиши керак бўлган.Сўнгги маълумотларга кўра, Колумбиядаги авиаҳалокат оқибатида қурбон бўлганлар сони 75 кишига етди. Бразилияда авиаҳалокат муносабати билан уч кунлик мотам эълон қилинди.
Жанубий Америка конфедерацияси (КОНМЕБОЛ) ўз байроғи остидаги халқаро турнирлар ўтказилишини маълум муддатга тўхтатиб қўйди.Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)