Сурияда 500 минг бола қамал шароитида яшамоқда

Сурияда қамал шароитида яшаётган болаларнинг сони охирги йил ичида икки мартага ошиб, 500 минг кишига етган. Бу ҳақда БМТнинг ЮНИСЕФ жамғармаси ҳисоботида маълум қилинди, деб ёзади «Корреспондент.net».

«Сурияда қамал шароитида яшаётган миллионлаб одам, айниқса юз минглаб болалар учун мамлакатдаги ҳаёт туганмас даҳшатга айланган. Болаларга жароҳат етказилмоқда, ўлдирилмоқда, улар мактабга бориш ёки ҳатто ўйнашга қўрқади. Улар озиқ-овқат ва тиббий ёрдам етишмовчилиги шароитларида кун кечирмоқда», — дейди ЮНИСЕФ ижрочи директори Энтони Лейк.

ЮНИСЕФнинг баҳо беришича, 500 минг нафаргача бола мамлакатнинг 16 та қамал қилинган аҳоли пунктида, улардан 100 минг нафари шарқий Алеппода яшайди. Болалар таълим олиш ва тиббий ёрдамни уйлар, мактаб ва шифохоналарнинг ертўлаларида олишга мажбур.