Россиялик журналистлар самолёт носозлиги туфайли Путин иштирокидаги APEC тадбирларининг ярмини ўтказиб юборади

Россия президентининг Осиё—Тинч океани иқтисодий ҳамкорлиги (APEC) саммитидаги иштирокини ёритиш учун Перу ройтахти Лимага йўл олган журналистлар Ил-96300 самолётидаги носозликлар туфайли Путин қатнашадиган тадбирларни ярмисини ўтказиб юборишга мажбур бўлади. Бу ҳақда «ТАСС» хабар бермоқда.

Ҳаво кемасидаги носозлик Москва — Лима йўналишида бортида Россия делегациясининг бир қисми ва журналистлар билан учаётган самолёт Португалияда ёқилғи тўлдириб олиш учун қўнганида аниқланди. Лайнер капитанига кўра, аниқланган камчиликни бартараф этиш учун зарур эҳтиёт қисмлар Москвадан етказиб келинганидан кейингина парвозни давом эттириш мумкин.

Шу тариқа, Россия делегациясининг бир қисми 19 ноябрь, шанба куни Тошкент вақти билан 20:00 атрофидагина учиб кетиши мумкин. Лиссабондан Лимагача парвоз вақти 11 соатни ташкил этади.

Эслатиб ўтамиз, олдинроқ Швейцария ҳарбий ҳаво кучларининг F-18 қирувчилари мазкур самолётга яқин масофада ҳамроҳлик қилгани ҳақида хабар берилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.