АҚШ фуқароси Қирғизистон жанубида 1 миллион доллар ҳажмида суғурта тўловини қўлга киритиш учун ўзининг ўлими ҳақида қалбаки ҳужжат тайёрлади, деб ёзади «ТАСС» Қирғизистон ички ишлар вазирлигига таяниб.
У Ўш вилоятининг Карасуй туманидаги қабристонда сохта дафн маросимини ўтказиб, ҳатто қабр тоши ҳам қўйди. Шундан сўнг унинг қариндошлари суғурта компаниялари ва дипломатик ваколатхоналарга бориб, компенсация талаб қила бошлади.
Қирғизистонга келган Америка суғурта компанияси вакилларига «марҳум»нинг дўст ва қариндошлари қабр тошини ва вафот этганлик ҳақидаги маълумотномани кўрсатди.
31 ёшли хорижликнинг исм-шарифи ошкор этилмаяпти. У ўтган ўн йиллик бошидаёқ АҚШга доимий яшаш учун жўнаб кетгани маълум. Вафоти тўғрисидаги маълумотномани у регистрация ҳужжатларидаги қайдларни сохталаштириш орқали қўлга киритган. Унга Ўш вилоятидаги касалхоналардан бирининг шифокори ёрдам бергани тахмин қилинмоқда.
Хорижликка нисбатан жиноят иши қўзғатилиб, халқаро қидирувга берилди.
Изоҳ (0)